मध्यंतरी असे वाचनात आले की, व्हिएतनामचे एक राजकीय शिष्टमंडळ भारत भेटीवर आले होते. त्यावेळी त्या मंडळाने छत्रपती शिवरायांच्या रायगडाला आवर्जुन भेट दिली. व्हिएतनामने शिवाजीराजांसारखे गनिमी काव्याने लढून अमेरिकेसारख्या बलाढ्य शत्रूला नामोहरम केले. शिवरायांना गुरुस्थानी मानणारा व्हिएतनाम प्रत्यक्ष बघता आला. कंबोडियामध्ये भारतीय संस्कृतीची नाममुद्रा रामायण-महाभारतातील अद्वितीय शिल्पांमधून उमटली आहे ती पाहता आली. छोटासा पण वैशिष्ट्यपूर्ण भूतान अनुभवता आला. लालसर पांढऱ्या अफाट वाळूमधील जॉर्डन आणि इस्लामी राष्ट्रांच्या गराड्यात स्वकर्तृत्वाने, सन्मानाने उभा असणारा जिद्दी इस्त्रायलही पाहिला.